Vrasja e turistit portugez në Ksamil, policia “zbarkon” në Vorë dhe Kukës

Policia ka intensifikuar kërkimet për kapjen e dy personave të shpallur në kërkim në lidhje me vrasjen e turistit portugez në Ksamil, ngjarje e rëndë e ndodhur pak ditë më parë.

Gazetarja Klodiana Lala raporton se forcat e Policisë po zhvillojnë një operacion të gjerë, duke kryer kontrolle në Vorë, Kukës dhe në disa zona të Tiranës, në përpjekje për të lokalizuar dy personat e kërkuar.

Në kuadër të operacionit po kërkohen Daniel Gjana, alias Heurteven, si dhe Bekim Bulica, pronar i subjektit “Principotes”.

Sipas informacioneve, Gjana dyshohet se mund të jetë fshehur në zonën e Vorës, ndërsa kontrollet janë shtrirë edhe në zona të tjera, pasi Policia po verifikon gjurmët dhe lëvizjet e dy personave.

Një tjetër pistë që po hetohet është mundësia që të kërkuarit të jenë larguar nga Shqipëria. Ka dyshime se ata mund të kenë kaluar tashmë në territorin e Kosovës, çka ka zgjeruar edhe më tej kërkimet për lokalizimin dhe kapjen e tyre.

Operacioni vjen në vijim të hetimeve për zbardhjen e plotë të rrethanave të vrasjes së turistit portugez në Ksamil, ndërsa Policia vijon kontrollet për të identifikuar vendndodhjen e personave të shpallur në kërkim.