Vrau me thikë vëllanë pas konfliktit banal, arrestohet 76-vjeçari

Një ngjarje e rëndë kriminale ka tronditur zonën e Kavajës, ku një 76-vjeçar dyshohet se i ka marrë jetën vëllait të tij pas një konflikti të çastit. Sipas burimeve zyrtare, autori i dyshuar është vënë në pranga nga policia e Durrësit, ndërsa rrethanat e plota të ngjarjes mbeten ende në hetim.

Krimi ka ndodhur në fshatin Agonas, ku i moshuari me inicialet M. Rr. dyshohet se ka goditur me thikë vëllanë e tij, shtetasin E. Rr., 74 vjeç. Si pasojë e plagëve të marra, viktima nuk ka mundur të mbijetojë.

Menjëherë pas ngjarjes, forcat e policisë kanë ndërhyrë duke bërë të mundur arrestimin e autorit të dyshuar. Gjatë veprimeve hetimore, është sekuestruar edhe arma e krimit, një mjet prerës që dyshohet të jetë përdorur në momentin fatal.

Paraprakisht, dyshohet se konflikti mes dy vëllezërve ka nisur për motive të dobëta, megjithatë hetimet vijojnë për të zbardhur plotësisht dinamikën dhe shkaqet që çuan në këtë akt ekstrem.

Materialet procedurale i janë referuar Prokurorisë pranë Gjykatës së Durrësit, e cila do të vijojë me hapat e mëtejshëm ligjorë për këtë çështje.

Njoftimi i Policisë:

Arrestohet M. Rr., 76 vjeç, pasi dyshohet se mbrëmjen e dejshme, në fshatin Agonas, Kavajë, ka vrarë me mjet prerës (thikë), për motive të dobëta, vëllanë e tij, shtetasin E. Rr., 74 vjeç.
Thika që dyshohet se u përdorur u sekuestrua në cilësinë e provës materiale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.