Zbardhen detajet e arrestimit, Gjesti akuzohet për 3 vepra penale

Prokuroria Themelore në Prishtinë ka vendosur ndalimin për 48 orë të këngëtarit të njohur Besart Kelmendi, i njohur për publikun me emrin artistik Gjesti.

Sipas autoriteteve, masa e ndalimit është marrë me urdhër të prokurorit kujdestar, pas dyshimeve se artisti mund të jetë i përfshirë në disa vepra penale. Dyshimet lidhen me posedimin e paautorizuar të armëve, si edhe me veprat penale të kanosjes dhe dëmtimit apo shkatërrimit të pronës.

Në njoftimin zyrtar bëhet e ditur se hetimet janë duke u zhvilluar nga Policia e Kosovës në bashkëpunim të ngushtë me Prokurorin e Shtetit. Autoritetet po ndërmarrin të gjitha veprimet e nevojshme hetimore dhe procedurale për të sqaruar rrethanat e plota të ngjarjes.

Megjithatë, për shkak se çështja ndodhet ende në fazat e para të hetimit, organi i akuzës ka bërë të ditur se nuk mund të publikohen më shumë detaje në këtë moment. Sipas Prokurorisë, kufizimi i informacionit synon të ruajë integritetin e procesit hetimor dhe të mos pengojë zhvillimin e procedurave.

Institucioni i akuzës thekson gjithashtu se brenda afateve të parashikuara nga legjislacioni në fuqi do të ndërmerren hapat e mëtejshëm proceduralë dhe do të merret vendim për masat që mund të aplikohen ndaj të ndaluarit, në përputhje me dispozitat e Kodit të Procedurës Penale të Republikës së Kosovës.