Zbarkoi në zyrën e Ramës, ja kush fshihet pas minierës 1 miliard euro në Bilisht

Mediat greke shpërthyen dy ditë më parë lajmin e madh për një investim gjigand greko-amerikan në Bilisht të Korçës. Sipas gazetave greke, Aktor Group e Greqisë dhe BNI Foundation kanë nënshkruar një marrëveshje për të investuar 1 miliardë euro në minierat e Nikelit në Korcë.

Sipas tyre, një pjesë e madhe e financimit do të sigurohet nga kapital amerikan, ndërsa projektin do ta mbështesin teknikisht dhe këshillimisht kompani me bazë në SHBA, duke treguar rëndësinë strategjike të tij për zinxhirin perëndimor të furnizimit me burime kritike. Marrëveshja për këtë investim u trajtua në sfondin e vizitës së papritur të ambasadores amerikane në Athinë, Kimberly Guilfoyle në zyrën e Edi Ramës në Tiranë.

Ndonëse kompania greke Aktor në deklaratën e saj u kujdes të theksonte se marrëveshja është nënshkruar me BNI Foundation, disa gazeta greke si Prototema flasin për një marrëveshje mes Aktor dhe një kompanie të quajtur Brightnest shpk.

Brightnest shpk është një kompani e themeluar në tetor të vitit të kaluar. Kompania ka një kapital prej 100 lekësh ose 1 euro dhe pronari i saj është Mirsad Uruçi.

Ky lajm konfirmohet edhe nga pamjet e takimit mes kryeministrit Edi Rama dhe ambasadores amerikane në Athinë Guilfoyle. Fillimisht në pamje shfaqen ambasadorja Guilfoyle dhe presidenti i grupit Aktor.

Por më pas në pamje shfaqet edhe një person i tretë duke mbajtur çantën. Ai është Mirsad Uruçi, pronari i kompanisë Brightnest.

Zoti Uruçi nuk është një emër i panjohur për publikun shqiptar. Përvecse përfaqëson kompaninë serbe të energjisë, EFT, emri i Uruçit doli në publik edhe në koncesionin e famshëm të centralit diellor të Akërnisë, që nuk u realizua asnjëherë.

Edhe ky koncesion u shit si investim nga një kompani e madhe ndërkombëtare, por me kalimin e kohës rezultoi se pas tij qëndronte pikërisht Mirsad Uruçi. Kompania e krijuar për koncesionin e Akërnisë e paditi Shqipërinë në arbitrazh duke kërkuar 110 milionë euro, por gjyqi u braktis se ajo nuk pagoi tarifën e padisë.