Zbulohet skenari i protestës së PD-së, s’ka më podium dhe fjalime

Ndërsa Partia Demokratike përgatitet për protestën e radhës përpara godinës së Kryeministrisë, kanë dalë në dritë detajet e para mbi mënyrën e organizimit të këtij tubimi.

Sipas raportimeve mediatike, protesta pritet të zhvillohet pa fjalime dhe pa podium nga drejtuesit politikë, duke sinjalizuar një format ndryshe nga tubimet e mëparshme. Gjithashtu, ajo nuk do të përqendrohet vetëm përpara Kryeministrisë, pasi organizatorët po shqyrtojnë një itinerar më të gjerë lëvizjeje. Rruga që do të ndjekë protesta mbetet ende në diskutim.

Për garantimin e rendit dhe sigurisë, rreth 1500 efektivë të Policia e Shtetit janë angazhuar në terren.

Autoritetet kanë njoftuar gjithashtu kufizime të përkohshme në qarkullimin rrugor. Nga ora 09:30 e mëngjesit të sotëm e deri në përfundim të tubimit, do të bllokohet lëvizja e automjeteve në bulevardin Dëshmorët e Kombit, nga Ura deri në kryqëzimin me rrugën Ismail Qemali.

Ndërkohë, duke nisur nga ora 15:00 e deri në përfundim të protestës, do të bllokohen edhe rrugët Ukraina e Lirë, Papa Gjon Pali II dhe sërish segmenti i rrugës Ismail Qemali.

Në njoftimin zyrtar, Policia e Tiranës kërkon mirëkuptimin e qytetarëve për këto kufizime dhe apelon që të shmangin çdo situatë që mund të cenojë rendin dhe sigurinë publike, duke u distancuar nga çdo veprim i kundërligjshëm gjatë zhvillimit të protestës.