Zhdukja e Jan Prengës, GJKKO dënon me burg përjetë Altin Hajrin

Gjykata e Posaçme ka shpallur fajtor dhe ka dënuar me burgim të përjetshëm Altin Hajri për rrëmbimin me pasojë vdekjen e Jan Prenga, një ngjarje e rëndë e ndodhur në janar të vitit 2020 në Kamza.

I pandehuri ka mohuar përfshirjen në krim përmes mbrojtjes së tij ligjore, duke pretenduar se nuk kishte dijeni për planin e rrëmbimit. Megjithatë, gjykata vlerësoi provat dhe e konsideroi atë përgjegjës për një nga krimet më të rënda të viteve të fundit. Për të njëjtën çështje, më herët është dënuar gjithashtu me burgim të përjetshëm edhe Festim Bexhdili.

Ngjarja daton më 17 janar 2020, kur Jan Prenga u rrëmbye në zonën e Kamzës dhe më pas u transportua drejt një resorti në Shijak, në pronësi të Altin Hajrit. Sipas hetimeve, ai u mbajt në këtë ambient ku u dhunua në mënyrë brutale. Dyshohet se si pasojë e torturave, 49-vjeçari humbi jetën, ndërsa autorët më pas tentuan të zhdukin trupin për të fshehur gjurmët e krimit.

Pavarësisht operacioneve të shumta kërkimore në zonën e Shijakut dhe rrethinat e saj, trupi i viktimës nuk është gjetur ende, duke e bërë çështjen edhe më të rëndë për familjarët dhe drejtësinë.

Hetimet kanë zbuluar se rrëmbimi lidhej me një konflikt të trafikut të drogës. Vëllai i viktimës, Astrit Prenga, kishte bllokuar një sasi të konsiderueshme kokaine që i përkiste Dritan Rexhepaj, i cili ndodhet i burgosur në Ekuador. Si formë presioni për lirimin e ngarkesës, dyshohet se Rexhepaj urdhëroi rrëmbimin e Jan Prengës, por situata degradoi duke çuar në vdekjen e tij.

Në kuadër të këtij hetimi janë arrestuar dhe persona të tjerë të dyshuar si të përfshirë, mes tyre Bajram Hajri, Leonard Hajri, Olsi Turja, Elton Hajri dhe Ardian Doçaj.

Kjo çështje vijon të mbetet një nga dosjet më të bujshme kriminale në vend, ndërsa drejtësia po përpiqet të zbardhë plotësisht rrethanat dhe përgjegjësitë përfundimtare.