Zjarr në banesën në Qytet Studenti, shpëton mrekullisht nëna me dy fëmijët

Një ngjarje e rëndë është regjistruar mëngjesin e kësaj të marte në zonën e Qytetit Studenti, ku një banesë private është përfshirë nga flakët rreth orës 08:30, duke u shkrumbuar pothuajse plotësisht.

Sipas të dhënave paraprake, në momentin kur ka rënë zjarri brenda banesës ndodheshin një nënë e divorcuar dhe dy fëmijët e saj të mitur. Falë reagimit të shpejtë, ata kanë mundur të dalin në kohë nga ambienti i përfshirë nga flakët, duke shmangur një tragjedi të mundshme.

Tre anëtarët e familjes janë transportuar drejt spitalit për kontrolle mjekësore, por fatmirësisht nuk kanë pësuar lëndime serioze apo pasoja nga asfiksia e tymit.

Ndërkohë, zjarri ka shkaktuar dëme të mëdha materiale, duke e bërë banesën të pabanueshme. Forcat zjarrfikëse kanë ndërhyrë për neutralizimin e flakëve dhe izolimin e rrezikut në zonë.

Paraprakisht dyshohet se shkaku i zjarrit mund të ketë qenë një defekt në rrjetin elektrik, ndërsa grupet hetimore po punojnë për të përcaktuar me saktësi rrethanat dhe origjinën e ngjarjes.