Zjarri dogji 400 pemë ulliri në ‘Qafën e Vidhit’, arrestohet 54-vjeçari

Një ngjarje e rëndë është regjistruar në zonën e Mallakastrës, ku një zjarr i përhapur në “Qafën e Vidhit” ka shkaktuar dëme të konsiderueshme në bujqësi. Policia ka arrestuar një 54-vjeçar, i dyshuar si autor i zjarrvënies që çoi në djegien e rreth 400 pemëve ulliri.

Sipas të dhënave zyrtare, në pranga është vënë shtetasi Ardian Xhafo, i cili akuzohet për veprën penale “shkatërrim i pronës me dashje”. Ai është kapur në flagrancë pranë vatrës së zjarrit, në momentin kur flakët po përhapeshin me shpejtësi në zonë.

Menjëherë pas marrjes së njoftimit për zjarrin, shërbimet e Policisë së Mallakastrës kanë ndërhyrë në vendngjarje, duke bashkëpunuar me forcat zjarrfikëse për izolimin e flakëve dhe njëkohësisht për nisjen e hetimeve mbi shkaqet e ngjarjes.

Gjatë kontrollit në terren, efektivët kanë konstatuar praninë e 54-vjeçarit pranë vatrës së zjarrit, duke ngritur dyshime të forta se ai ishte personi që kishte shkaktuar zjarrin. Si pasojë e përhapjes së flakëve, janë shkatërruar qindra pemë ulliri, duke sjellë dëme të mëdha ekonomike për zonën.

Pas veprimeve të para procedurale, specialistët për hetimin e krimeve kanë bërë arrestimin në flagrancë të tij, ndërsa materialet i janë referuar Prokurorisë së Fierit për vijimin e hetimeve dhe ndjekjen penale.

Autoritetet vendore të Policisë kanë përsëritur apelin për qytetarët që të shmangin ndezjen e zjarreve në ambiente të hapura, pasi rreziku i përhapjes është i lartë dhe mund të sjellë pasoja të rënda për mjedisin, pronën dhe jetën e njerëzve.

Policia gjithashtu u bën thirrje qytetarëve që të raportojnë çdo rast të dyshuar për zjarrvënie apo shkelje të ligjit, duke kontaktuar numrin emergjent 112, duke garantuar reagim të shpejtë dhe ruajtje të plotë të anonimatit.