Zjarri jashtë kontrollit në Krujë, flakët drejt depos me eksploziv

Situata nga zjarret në zonën e Krujës vijon të jetë kritike, ndërsa flakët në fshatin Zidoll po përhapen me ritme të shpejta dhe po afrohen rrezikshëm pranë zonave të banuara. Terreni i vështirë dhe era e fortë kanë favorizuar avancimin e zjarrit, duke e bërë ndërhyrjen e forcave në terren më të komplikuar.

Një nga shqetësimet kryesore lidhet me afrimin e flakëve drejt një depoje me eksploziv që ndodhet në zonë, çka rrit ndjeshëm nivelin e rrezikut. Autoritetet po ndjekin me kujdes zhvillimet, ndërsa përpjekjet janë përqendruar në izolimin e vatrës dhe shmangien e çdo skenari të mundshëm me pasoja të rënda.

Në afërsi të frontit të zjarrit ndodhet edhe Lagjja e Selimëve, ku rreziku për banesat është shtuar ndjeshëm. Banorët janë në gatishmëri, ndërsa strukturat e emergjencave po punojnë për të mbrojtur zonat e banuara dhe për të parandaluar përhapjen e mëtejshme të flakëve.

Ndërkohë, situata është përkeqësuar edhe më tej pas riaktivizimit të një tjetër vatre zjarri në lagjen Abaze, duke e bërë operacionin edhe më sfidues për ekipet në terren.

Në aksion është angazhuar edhe një helikopter, i cili po operon nga ajri në të dyja vatrat aktive. Mjeti ajror po kryen hedhje të vazhdueshme uji si në zonën e Zidollit, përfshirë hapësirën pranë depos me eksploziv, ashtu edhe në lagjen Abaze, me qëllim neutralizimin e flakëve dhe vënien e situatës nën kontroll.

Autoritetet u bëjnë thirrje qytetarëve të shmangin zonat e rrezikuara dhe të ndjekin udhëzimet e strukturave përkatëse, ndërsa operacioni për shuarjen e zjarrit vijon me intensitet të lartë.