1 tetor nis numërimi i popullsisë e banesave!

Nga arsimi e profesioni, te përkatësia fetare, zbulohen disa nga pyetjet

Në një tetor të këtij viti do nisë në Shqipëri censusi i popullsisë dhe banesave. Lajmin e ka dhënë vetë drejtoresha e INSTAT, Elsa Dhuli, e cila tha se ky proces do të zgjasë 6 javë, ndërsa ka përfunduar procesi pilot. Gjatë diskutimeve në Komisionin e Ekonomisë mbi projektligjin “Për miratimin e programit të statistikave zyrtare 2022-2026”, Dhuli u shpreh se INSTAT është duke bërë përgatitjet e fundit për dy censuset e reja, të cilat zhvillohen 1 herë në 10 vite.

“Për arsye të tërmetit, pandemisë dhe zgjedhjeve parlamentare, INSTAT e shtyu censin e popullsisë në tetor të vitit 2022. Në 1 tetor të këtij viti, Instituti i Statistikave do të organizojë censin e popullsisë dhe të banesave në të gjithë vendin, duke angazhuar afro 8 mijë të punësuar, si dhe do të vendosë në dispozicion të gjithë stafin e tij për këtë aktivitet, nga më madhorët në vend, që kryhet 1 herë në dhjetë vjet. Periudha që do të zgjasë censusi do të jetë 6 javë, nga 1 tetorit deri në 15 nëntor. Aktualisht jemi duke analizuar gjetjet nga projekti pilot dhe kemi marrë masa si të analizojmë problematikat e ndeshura gjatë pilotit në mënyrë që të realizojmë një proces të suksesshëm. Censusi numëron të gjithë popullsinë rezidente në territorin e Shqipërisë. INSTAT ka realizuar 41 takime me kryetarët e Bashkive nga 61 bashki, në mënyrë që të kemi mbështetje gjithëpërfshirëse të pushtetit lokal”, tha Dhuli përpara ligjvënësve.

Për sa u përket pyetjeve kryesore që do të përmbajë censusi, drejtoresha e INSTAT nuk dha shpjegime, por ajo sqaroi edhe çështjen që lidhet me përcaktimin në census të besimit fetar.

“Një ndër grupet e interesit më aktive gjatë projektit pilot në 9 bashki kanë qenë komunitetet fetare, që kanë marrë pjesë në të gjitha këto takimet. Kemi kryer takime të ngushta edhe me përfaqësues të komuniteteve fetare, pasi në pyetësorin e censusit, do të jenë pyetje mbi përkatësinë fetare, e cila konsiderohet pyetje sensitive dhe, në përgjigje të saj, personi ka të drejtë të mos përgjigjet, por pa u penalizuar. Struktura dhe përmbajtja e bashkësive fetare është në bazë të strukturës që ekziston në vend, e dakordësuar me vetë komunitetet. Po ashtu, censusi ka edhe pyetje mbi identitetin e lirë etnik të popullsisë rezidente apo mbi gjuhën”, tha Dhuli.

Nga ana tjetër, kujtojmë që në censusin e vitit 2011 kishte pyetje mbi nivelin e arsimit, profesionin, moshën etj., të cilat do të jenë përsëri pjesë e tij. Në bazë të ligjit të censusit janë krijuar dy komisione për censusin e popullsisë dhe banesave. Komisioni qendror, i cili drejtohet nga zëvendëskryeministri, por anëtarë janë të gjithë ministrat e kabinetit qeveritar dhe komisionet e censusit në nivel bashkie, të cilët drejtohet nga kryetarët e Bashkive, ku anëtarë janë punonjës të bashkive dhe punonjës të INSTAT.

CENSUSI I BUJQËSISË

Për sa i përket censusit të Bujqësisë, drejtoresha e INSTAT theksoi se: “Censi i bujqësisë ishte i parashikuar të kryej në vitin 2022, por për shkak të shtyrjes së censusit të popullsisë, jemi të detyruar ta shtyjmë. Kjo për faktin se censusi i popullsisë përmban një modul me pyetje mbi aktivitetin në bujqësi. Pra, bazuar në rezultatet që do të mblidhen gjatë censusit të popullsisë, do të krijohet databaza për organizimin e censusit të bujqësisë. Grumbullimi i të dhënave do të bëhet me tablet, të cilat do të përdoren edhe në vazhdim për censin e bujqësisë dhe rezultatet e para do të jenë gati në fillim të vitit 2023. Gjatë këtij viti, do të kryhen të gjitha proceset, testimet dhe censi pilot për censusin e bujqësisë dhe në vitin 2024 do të organizohet censusi. E pyetur për buxhetin, Dhuli siguroi se fondi prej 4.8 milionë eurosh i iniciuar nga BE nuk është shpenzuar dhe është në dispozicion të këtij procesi.