27-vjeçarit i shpërthen granata, dy të rinj në gjendje kritike për jetën

Një incident i rëndë ka ndodhur në fshatin Mamaj, në territorin e bashkisë Tepelenë, ku dy të rinj kanë mbetur të plagosur si pasojë e shpërthimit të një mjeti shpërthyes.

Sipas të dhënave paraprake, një 27-vjeçar ndodhej brenda një kasolleje ku dyshohet se ruheshin granata. Në rrethana ende të paqarta, njëra prej tyre ka shpërthyer në duart e tij, duke i shkaktuar dëmtime tepër të rënda. Burime jozyrtare bëjnë me dije se i riu mund të ketë humbur të dyja gjymtyrët e sipërme.

Ai u transportua fillimisht në spitalin më të afërt, por për shkak të gjendjes kritike është dërguar me urgjencë drejt Tiranës për trajtim më të specializuar.

Nga i njëjti shpërthim ka mbetur i plagosur edhe një tjetër i ri, rreth 20 vjeç, i cili ka pësuar dëmtime serioze në kokë dhe fytyrë. Aktualisht ai ndodhet nën kujdesin e mjekëve në spitalin e Gjirokastrës, ndërsa pritet transferimi i tij drejt kryeqytetit për ndërhyrje më të avancuara.

Paraprakisht dyshohet se lënda shpërthyese ndodhej brenda kasolles ku ndodheshin të rinjtë në momentin e ngjarjes. Autoritetet po punojnë për të sqaruar rrethanat dhe për të zbardhur plotësisht shkaqet e këtij incidenti të rëndë.