Zbulohet nga ku u dërgua e-maili kërcënues ndaj institucioneve

Disa institucione shtetërore në Shqipëri kanë marrë email-e kërcënuese, përmes të cilave pretendohet se është vendosur një mjet shpërthyes dhe paralajmërohen veprime hakmarrëse ndaj tyre.

Në mesazhet e dërguara, autori prezantohet si “udhëheqës i milicisë serbe” dhe përdor gjuhë kërcënuese ndaj institucioneve që kanë marrë komunikimet.

Sipas asaj që raportohet në media, email-et janë nisur përmes domenit të Unitropico-s, Universitetit Ndërkombëtar të Tropikut Amerikan, një universitet publik me seli në Yopal të Kolumbisë. Mesazhi është dërguar me emrin Eduardo Padilla Lopez.

Pas marrjes së kërcënimeve, Policia e Shtetit ka nisur menjëherë verifikimet për të sqaruar rrethanat e rastit dhe për të përcaktuar burimin e komunikimeve.

Deri tani, nuk është konstatuar asnjë rast i vendosjes së lëndëve shpërthyese. Ndërkohë, nën drejtimin e Prokurorisë, strukturat e specializuara të Policisë së Shtetit po vijojnë hetimet për identifikimin e personit përgjegjës dhe zbardhjen e plotë të ngjarjes.