UDHËHEQËSI

Urim Bajrami

Një makinë luksoze para meje. Rrotull saj, 4 a 5 djem të rinj, me uniformën e truprojës. Në duar mbajnë radio marrëse e dhënëse.

Komunikojnë shpesh. Nuk e di më kë. Mbase me dy civilë, që janë nja 20 metra më tutje. Mbase me dy të tjerë pas tyre. Ose me truprojat që janë lart, në katin e shtatë të një pallati të ri 13-katësh. Ndoshta me policin mbi motor, i cili është mu në mes të rrugës kryesore.

Me gishtin tregues të dorës së djathtë, polici duket sikur u lutet shoferëve: “Një minutë, një minutë…”!

Polici ka ndaluar lëvizjen e makinave. As për lart e as për poshtë.

Makinat shtohen njëra pas tjetrës. Ata nga fundi, që nuk e shohin policin rrugor, u bien borive. Është piku i trafikut në atë rrugë.

Eci dhe po i afrohem policit. Bëj sikur flas në telefon. Ai flet në radio. “Doli?”, pyet ai. “Po del”, vjen përgjigjja në radion e policit. “U vonua pak, ishte në tualet”, shfajësohet zëri matanë radios.

Polici ngre përsëri gishtin tregues të dorës së djathtë dhe u lutet me shenjë shoferëve. Ata kanë filluar ta humbasin durimin.

Një minutë. Dy. Tre…

Makina e udhëheqësit, poshtë pallatit ku ai banon, ngjitur me hyrjen, s’po lëviz. “Duhet të jetë kthyer përsëri në uturak”, bëj shaka me veten. Shaka, por jo gjysma. “Liro rrugën, se u kthye prapë në banjë”, ishte urdhri i radhës në radion e policit rrugor.

Polici, një burrë babaxhan, ngre dorën e djathtë dhe lejon lëvizjen e makinave. Me dorën e majtë fshin djersët e ballit.
Trafiku i lirua.

Një, dy, tre minuta…

“Blloko rrugën, se po del” ishte urdhri i dytë. Polici, sërish të njëjtin ritual. Me gishtin tregues të dorës së djathtë bllokon lëvizjen e makinave. “Ju lutem, një minutë”, duket sikur u thotë.

Bëj sikur flas ende në telefon.

Një minutë, dy, tre…

Ndërkohë, kthej kokën nga makina e udhëheqësit. Nga larg mezi shquaj numrin e parë të targës. 7…

Makina nis të lëvizë. Ngadalë. Shumë ngadalë. 3 minuta për 50 a 60 metra rrugë. “Ndoshta udhëheqësi ka probleme me shëndetin”, mendoj sërish me vete.

Polici ndezi sirenën dhe u nis duke i prirë makinës së udhëheqësit. Pas makinës së liderit, nja tre makina të tjera shoqërimi. Me sirena.

Trafiku u zhbllokua.
Boritë pushuan.
Unë vazhdova rrugën.
Diku ndalova.
Gugëllova CV-në e udhëheqësit.
E gjeta.
Bashkë me moshën.

Ishte 77 vjeç…