Pse Basha turret të kërkojë zgjedhje?

Lulzim Basha e ka lidhur dështimin e Rilindjes në hapjen e negociatave me padurimin për tu rikthyer vetë në pushtet. Gjatë një conference të paralajmëruar me ngut, ai ka shpallur se: “Ne na duhet një qeveri e re, një qeveri që e çon vendin drejt dhe BE dhe kjo qeveri duhet të dalë nga zgjedhje të lira dhe të ndershme.”

Deri diku nu ka asnjë mëkat. Edhe opozita maqedone u soll në të njëjtën mënyrë, siç do të bënte në fakt çdo lloj minorance tjetër në një demokraci.

Por, me Bashën dhe PD-në problemi është pak më i ndryshëm. Së pari sepse ata përpara një qeverie të re që predikojnë sot, kanë kërkuar disa muaj më parë një kabinet teknicienësh që të normalizojë situatën e polarizuar politike.

E dyta se ata kanë pasur një kusht të pa negociueshëm: “Nuk ka zgjedhje me Edi Ramën kryeministër”, për të cilin dogjën mandatet dhe bojkotuan gjedhjet vendore.

Duke i harruar këto dy vija të kuqe të pa negociueshme, dhe duke kërkuar zgjedhje pa kaluar më parë nga një qeveri e përbashkët stabilizuese, së pari lideri i PD-së lë përshtypjen sikur dy lëvizjet më “heroike” të opozitës, paskan qenë të gabuara. Ai i shërben propagandës të Ramës që pretendonte atëhere se PD-ja nuk hynte në zgjedhje pasi i trembej humbjes. Pra sot, kur Rama është i refuzuar nga BE dhe PD-ja e sheh fitoren më pranë, parimet e predikuara nuk paskërkan rëndësi.

Së treti këto pirueta e shfaqin liderin e PD-së si një oportunist meskin, që sapo i shfaqet mundsia e karriges, i harron të gjitha sa ka thënë.

Por, pavarësisht nga këto vëzhgime që kanë të bëjnë me profilin personal të Bashës, realisht vendit i duhet një qeveri tranzitore teknikësh, pa figura politike të dorës së parë, që të zbatojë kushtet e Bundestagut gjerman, që mos pengojë reformën në drejtësi duke synuar ta kapë atë, që mos bëhet pengesë për një ndryshim të sistemit zgjedhor. Vetëm një qeveri e tillë mund ta përgatisë vendin për negociatat dhe mund të shtrojë udhën për zgjedhje reale të lira e të ndershme.

Por, duke e anashkaluar atë që predikonte vetë, Basha rrezikon që nga tafmaja e madhe ti humbë të gjitha, për vete dhe për shqiptarët.Lapsi.al