TENDERI I DYSHIMTË, Ministrisë së Shëndetësisë për blerjen e kiteve mjekësore

Ky është kushti i çuditshëm i një tenderi të dyshimtë të Ministrisë së Shëndetësisë për blerjen e kiteve mjekësore për të testuar qytetarët për koronavirusin, i fituar nga kompania “OES Distrimed” me një vlerë prej 8.5 milionë lekë pa TVSH”.

Opozita akuzon qeverinë se për këtë tender, kompania OES DISTRIMED me aksionerë Orjada Jaho dhe Ermal Rizaj, po paguhet plot katër herë më shumë se çmimi real për kitet e koronavirusit “RT-PCR”.

Qeveria ka nënshkuar disa kontrata me kompaninë OES Distrimed, dhe vetëm njëra prej tyre është për kitet e testimit, ndërsa qeveria ka vendosur të mos ia publikojë emrin kompanisë si dhe shumën e tenderit.

Qeveria, me Vendimin e Këshillit të Ministrave nr. 272, dt. 03.04.2020, ka vendosur “Miratimin e kontratës për Lotin 1 me objekt ‘Blerje kite për laboratorin mikrobiologjik për realizimin e RT-PCR të përshtatshëm për t’u përdorur për pajisjen e Existation të firmës Bioneer ose ekuivalent për QSUT”.

Se si ka arritur OES Distrimed të fitojë këtë tender, mund të kuptohet nga kushti i vendosur nga qeveria. Nga nënshkrimi i kontratës, kompania ka patur vetëm dy orë kohë për të siguruar kitet, për ti ngarkuar dhe transportuar ato nga depot e veta drejt QSUT-së.