Masakroi kunatën me thikë në sy të vajzës, dënohet me burgim të përjetshëm Erdet Çapoku

Gjykata e Tiranës ka vendosur që të dënojë me burgim të përjetshëm Erdet Çapokun, i cili vrau me thikë kunatën e tij.

Ngjarja e rëndë ndodhi 9 muaj më parë në zonën e Paskuqanit në Tiranë. 34-vjeçari ka shkuar në banesën e kunatës dhe pasi ka shqyer derën është futur në dhomën e gjumit të viktimës, aty ku ka kryer dhe aktin makabër. Erdeti fillimisht e ka goditur me levë Enkeledën dhe pasi e ka lënë pa ndjenja i ka prerë me thikë në fytyrën, hundën si dhe damarët e dorës.

Ajo nuk ka mundur t’u rezistojë plagëve dhe ka ndërruar jetë pa shkuar në spital.

Viktima Enkeleda Çapoku jetonte se bashku me nënën dhe vajzën e saj. Ndërkohë që bashkëshorti ndodhej prej kohësh në burg.

Kunati i saj pretendoi në gjykatë se e vrau Enkeledën për shkak se ajo e kishte denoncuar në polici për përndjekje. Prej kohësh ai ishte vënë pas viktimës dhe i bënte foto e video teksa ecte në rrugë.

Gjatë seancës gjyqësore, Erdet Çapoku e ka pranuar krimin e tij dhe ka shfaqur pendesë.

“Unë kisha investuar tërë lekët e mia për të rritur mbesën e të ushqehej Enkeleda. Sa herë që ajo më kërkonte lekë, unë ia jepja dhe shkoja mirë me të, por pasi ajo u betua se do më fuste në burg, edhe unë u betova që ta vrisja sepse më kishte marrë tërë lekët e punës sime. Nuk kisha asnjë faj”, mësohet të ketë thënë Çapoku në gjykatë.

Ai është dënuar me burgim të përjetshëm dhe nuk mund të përfitojë ulje të dënimit.