Akuzat e Bashës për fshehjen e numrit të viktimave nga COVID, Meta: Ramës i takon t’i bëjë thirrje Prokurorisë për të hetuar që të mos mbajë asnjë përgjegjësi

Disa ditë më parë kreu i Partisë Demokratike Lulzim Basha akuzoi qeverinë se po fsheh shifrat e vërteta të vdekjeve nga COVID, duke ngjallur reagime të shumta në opinionin publik.

Presidenti Ilir Meta i ftuar në Abc News është shprehur se Prokuroria duhet të hetojë për këto akuza të Bashës, ndërsa shtoi se edhe kryeministrit Rama i takon t’i bëjë thirrje Prokurorisë për hetim, nëse do që të mos mbajë asnjë përgjegjësi.

“Mendoj se Prokuroria i detyrohet popullit shqiptarë për të hetuar dhe verifikuar disa akuza konkrete të ngritura jo vetëm nga Basha, por edhe kryeministrit i takonte t’i bënte thirrje Prokurorisë për të hetuar në mënyrë që të mos mbante asnjë përgjegjësi.
Transparenca duhet të kërkohet nga qeveria për të patur mbështetje efektive nga të gjithë.

Prokuroria e ka për detyrim ndaj popullit shqiptar, pasi duhet të hetojë edhe për abuzime të thjeshta dhe jo më për çështje që kanë të bëjnë me jetën e qytetarëve shqiptarë. Kjo do të ndihmonte për një bashkëpunim më të përgjegjshëm”, tha Meta.