Nuk ka asnjë hetim për dhunën e ushtruar nga policët gjatë protestave

Siç është thënë ditët e fundit akuzat nga shoqeria civile por edhe nga institucionet ndërkombëtare si Këshilli i Europës dhe OSBE kundrejt dhunës së ushtruar nga policia ndaj gazetarëve dhe të miturve kanë mbetur pa përgjigje.

Aktet e dhunës kanë ndodhur gjatë protestave të zhvilluara për vrasjen e Klodian Rashës ku ka pasur shumë përplasje mes qytetarëve dhe policisë. Policët nga dëshmitë e shumë qytetarëve dhe të arrestuarve kanë ushtruar dhunë të paprecedent por që për këtë nuk është nisur asnjë hetim nga organet kompetente.

Zyrtarisht policia e shtetit, SHCBA dhe avokati i popullit nuk prononcohen për nisjen e hetimeve, të cilat janë ndaluar në fazën e verifikimeve në terren të kryera nga institucioni i avokatit të popullit. Këta të fundit në inspektimet e kryera janë fokusuar tek cështja e të miturve të cilët janë shoqëruar nga policia, mbipopullimi i komisariateve por jo dhuna e ushtruar nga efektivët. Pas çdo proteste Policia e Shtetit, krahas arrestimit të protestuesve, kanë nisur hetime edhe për punonjësit e policisë, por këtë herë institucionet heshtin. Pas protestave masive të mbajtura nga opozita e bashkuar, blutë kanë dhënë masa disiplinore, vërejtje, apo dhe deri në paralajmërime për largime nga puna për efektivët që kanë tejkaluar kompetencat gjatë demonstratave. Gjatë 5 protestave të dhjetorit efektivët kryen veprime të dhunshme ndaj të miturve, protestuesve dhe jo protestuesve apo dhe punonjësve të medias të cilët ishin pjesë e demonstratave për të përcjellë zhvillimet në kohë reale. Hetime kanë nisur vetëm nga institucioni i prokurorisë së Tiranës, pas denoncimeve të kryera nga gazetarët për dhunën e ushtruar ndaj tyre nga punonjës civilë të policisë të angazhuar gjatë protestave.