Albin Kurti reagon për dhunën ndaj gazetarit: Koha e gangsterizimit ka perënduar, vendosni përgjegjësit para drejtësisë

Ndërkohë për rastin ka reaguar edhe kryeministri në ardhje i Kosovës, Albin Kurti. Me anë të një shënimi në facebook, Kurti i bën apel kujtdo që mendon të ndalojë demokracinë se koha e gangsterëve ka perënduar.

Kurti gjithashtu ka folur dhe për episodin e djalit të deputetit serb që u dhunua, duke thënë se këto fenomene janë vërtet negative.

Shënimi i Albin Kurtit

Qeveria kujdestare rekordeve të veta të këqija po u shton edhe atë të problemeve me rendin publik. Rrahja e familjarëve të politikanëve për shkak të qëndrimit të tyre politik, rrahja e gazetarëve për shkak të punës dhe fjalës së tyre, janë fenomene negative që populli i Kosovës nuk i duron. Qeveria e ardhshme e konsideron si mision ruajtjen e demokracisë dhe të lirisë së fjalës, bindjes e veprimtarisë politike, sipas ligjit. Ata që mendojnë se mund ta ndalin demokracinë me gangsterizim, le ta dinë se koha e tyre ka perënduar. Njëri-tjetrin mund “ta mundim” vetëm me fakte, me argumente, me logjikë e me mjete demokratike. U bëj thirrje forcave të rendit që me profesionalizëm e angazhim të vënë sa më shpejt para përgjegjësisë dhunuesit.

I uroj shërim të shpejtë e rikthim në detyrë gazetarit Visar Duriqi.