Kreu i KQZ: Ka filluar verifikimi i listave

Kreu i Komisionit Shtetëror të Zgjedhjeve Ilirjan Celibashi bën me dije se një ditë pas dorëzimit të listave të kandidatëve për deputetë, KQZ ka nisur verifikimin e dokumenteve.

 “Kanë depozituar lista shumemërore subjektet zgjedhore: LSI; LRE; LN; ADR; PLDSH; PNTH; PBK; PBD; koalicioni “Aleanca – AL”; koalicioni “ABEOK”; PSD; PS; koalicioni “PD-Aleanca për Ndryshim .

Menjëherë pas dorëzimit të listave shumemërore nga subjektet zgjedhore, KQZ ka filluar verifikimin e dokumenteve të kandidimit. Verifikimi i formularëve të vetëdeklarimit (dekriminalizimi) po bëhet në bashkëpunim me DPGJC dhe Drejtorinë e Përgjithshme e Burgjeve”, shkruan Celibashi në “Twitter”.

Pastërtia e figurës së kandidatëve për deputetë dhe integriteti i tyre ka qenë një kërkesë e vazhdueshme e ambasadores amerikane në Shqipëri Yuri Kim.

Pak para mesnate dy partitë e mëdha në Shqipëri dorëzuan listat e kandidatëve për deputetë në zgjedhjet e 25 prillit. Si PS ashtu edhe PD kanë bërë ndryshime sa u takon emrave të rinj që do të garojnë në këto zgjedhje.