Logoja fut në “sherr” PD-në dhe Bindjen Demokratike

Ndërkohë që na ndajnë 24 ditë nga zgjedhjet e 25 prillit, Partia Demokratike dhe Bindja Demokratike janë përplasur për logon me të cilën përfaqësohen.

Sekretari i Partisë Demokratike për çështjet ligjore Ivi Kaso, gjatë mbledhjes së sotme të KQZ-së, ngriti në prani të komisionerit Celibashi shqetësimin e ngjashmërisë së logos së selisë blu me partinë e drejtuar nga Astrit Patozi.

Ivi Kaso tha se ngjashmëria e logos së Partisë Demokratike dhe Bindjes Demokratike krijon konfuzion te votuesit. Ndërkaq, përfaqësuesi i Bindjes Demokratike Fabian Topollaj tha se ndryshimi është bërë dhe BD do të dërgojë logon e re, nën inicialet e së cilës do të mbishkruhet edhe emri i partisë.

“E konsideroj të mbyllur pjesën e stilizimit të logos. Ne me kënaqësi e kemi ndryshuar logon, në kohë rekord, dhe me qëllim që fleta e votimit të miratohet, të bëhet sa më shpejt dhe të vazhdojë procesi”, tha Topollaj.