28-vjeçari humbi jetën pasi ra nga kati i pestë i “Rogner”-it

Një 28-vjeçar i identifikuar si Ajdin Mustafi humbi jetën në mënyrë tragjike të premten pasi u rrëzua nga kati i pestë i hotel “Rogner”.

Policia bën me dije se ka referuar materialet për përgjegjësin e mirëmbajtjes R. H, 38 vjeç dhe administratorin e hotelit R. S., 49 vjeç, për veprën penale “shkelje e rregullave të mbrojtjes në punë”.

Dyshohet se i ndjeri ishte mbështetur në kangjellat e ballkonit të dhomës së tij, ku për shkak të amortizimit, ato janë shkëputur nga muri dhe për pasojë 28-vjeçari Ajdin Mustafi ka rënë nga lartësia.

28-vjeçari është përplasur mbi një automjet të parkuar poshtë hotelit. Mustafi pësoi dëmtime serioze dhe u dërgua në Spitalin e Traumës, por fatkeqësisht nuk u mbijetoi plagëve të marra.

NJOFTIMI

Në vijim të dokumentimit të plotë të ngjarjes së ndodhur në bulevardin “Dëshmorët e Kombit” ku aksidentalisht ra nga lartësia e hotelit ku qëndronte dhe për pasojë ndërroi jetë shtetasi A.M, 28 vjeç, specialistët për Hetimin e Krimit në Komisariatin e Policisë Nr. 1, referuan materialet për shtetasin R. H,, 38 vjeç, me detyrë përgjegjës i mirëmbajtjes dhe shtetasin R. S., 49 vjeç, me detyrë administrator i hotelit, për veprën penale “Shkelja e rregullave të mbrojtjes në punë”.