Zbardhet dinamika, errësira ndihmoi autorët

Dalin në dritë detaje në lidhje me atentatin që iu bë Iljaz Çalit mbrëmë në rrugën dytësore në autostradën Tiranë-Durrës.

Për pasojë, 37-vjeçari humbi jetën në vendin e ngjarjes pak para mesnate. Mësohet se ndaj makinës së viktimës është qëlluar rreth 100 metra në lëvizje, ndërsa automjeti tip “Land Rover”, i drejtuar prej Çalit është përplasur me bordurën e rrugës dhe ka vijuar të lëvizë pa kontroll për disa metra.

Policia mendoi se kishte të bënte me një aksident, ndërkohë pas këqyrjes së vendit të ngjarjes ku u gjetën edhe gëzhoja plumbash, u konstatua se kishin të bënin me një vrasje.

Viktima ishte duke udhëtuar nga Tirana drejt banesës së tij në fshatin Rinas i Ri. Po ashtu pati dyshime se në automjet ka pasur edhe një person tjetër, pasi e pasagjerit u gjet e hapur. Por më pas rezultoi se viktima udhëtonte i vetëm, ndërsa në mjet nuk u gjet asnjë send i paligjshëm.

Në cilësinë e provës materiale u sekuestrua telefoni celular i viktimës, për të zbardhur më tej detaje të mundshme rreth ngjarjes, nëse kemi të bëjmë me një pritë, apo ndonjë konflikt të pazbardhur. Nga këqyrja e mjetit, ai ka pasur dëmtime në anën e djathtë të tij, si dhe në xhamin e përparmë.

Duke u ndalur te autorët e ngjarjes, mendohet se ata kanë qenë duke lëvizur me një automjet prej të cilit dyshohet se edhe kanë qëlluar teksa kanë qenë në lëvizje. Policia ka shoqëruar disa persona në cilësinë e personave që mund të kenë dijeni për ngjarjen, familjarë apo dhe shokë të viktimës.

Hetuesit do ta kenë të vështirë identifikimin e autorëve pasi, kur ka ndodhur atentati, kanë qenë fikur edhe dritat e autostradës, në kuadër të nismës që ka marrë qëveria për kursimin e energjisë.