Gjenden dokumente të ish-Prokurorit të Tiranës e bashkëshortes së ish-kryebashkiakut të Sarandës

Detaje të reja publikohen nga ngjarja e Sarandës ku iu vu zjarri zyrës së noterit Aleko Anagnosti. Burime për Panorama.al, bëjnë me dije se në zyrë, krahas dokumenteve të noterit, ishin dhe një sërë dokumentesh që u takojnë një sërë zyrtarësh të tjerë.

Bëhet me dije se në zyrën e tij, ndodheshin dokumente të ish-prokurorit të Tiranës, Artan Lulajt i cili u shkarkua nga vetingu në muajin janar të këtij viti.

Gjithashtu, kishte dokumente që i përkasin noteres Ermioni Gjoka, bashkëshortja e ish-kryebashkiakut të Sarandës, Edmond Gjoka.

Policia prej disa orësh po vazhdon këqyrjen e vendit të ngjarjes për të përcaktuar dëmet e shkaktuara ndërkohë që njëkohësisht po kryen dhe sekuestrimin e dokumentacionëve me urdhër te Prokurorit.

Për shkak se noteri ndodhet në paraburgimin e Sarandës, në vendngjarje është paraqitur nëna e tij e moshuar.

Persona ende të paidentifikuar i vendosën flakën zyrës së noterit Aleko Anagnosti në orët e para të mëngjesit të sotëm.

Ky i fundit është arrestuar më 1 qershor sëbashku me zyrtarë të tjerë të Bashkisë Sarandë të akuzuar për tjetërsim pronash në bregdet.