Ushtria ruse ngec në kurth

Inteligjenca britanike thotë se trupat ruse, që po mbrojnë qytetin e Kherson në Ukrainë, kanë ngecur në kurth dhe janë shumë të ekspozuara ndaj një sulmi të mundshëm ukrainas.

Reagimi vjen pasi ushtria ukrainase shkatërroi apo dëmtoi urat që lidhin këtë qytet të madh me pjesën tjetër të pushtuar të vendit. Mediat kanë publikuar pamjet kur Ukraina shkatërron urën Antonovsky.

Kjo do të thotë se Rusia nuk ka një rrugë për të përforcuar apo për të furnizuar trupat e saj në qytetin Kherson në rast të një kundërsulmi- i cili pritet të nisë së shpejti.

Kundërofensiva ukrainase do të ishte kundërsulmi i parë i madh i këtij vendi, çka do të provonte se Ukraina është në gjendje të rimarrë territoret e pushtuara nga Rusia. Burimet e inteligjencës perëndimore besojnë se Ukraina është në gjendje të mirë për të fituar këtë betejë.