E vërteta e vdekjes ende mister

32-vjeçari Laer Kurti që vdiq në duart e policisë sot pasdite do të dërgohet në banesën e fundit.

Familjarët e të riut kanë tërhequr trupin e tij të pajetë nga morgu, ndërsa autoritetet ende nuk kanë dhënë një deklaratë për të përcaktuar shkakun e vërtetë të vdekjes.

Trupi i pajetë i Laerit është transportuar drejt një agjencie funerale, ku do të përgatitet për ceremoninë mortore që do të mbahet sot në orën 16:00.

I riu mësohet se ka ndërruar jetë pak para mesnate kur i riu ishte duke lëvizur në rrugën “Riza Cuka” në këmbë i vetëm dhe i arrestuar nga policia po shoqërohej në komisariat.

Ngjarja bëhet e mistershme për shkak të deklaratave të AMP dhe Traumës që bien ndesh me njëra-tjetrën.

AMP deklaron se Kurti është nisur rëndë me urgjencë dhe ka ndërruar jetë në spital, teksa trauma jep versionin e saj duke thënë se i riu ka shkuar pa shenja jete në spital.