Si u vu në pranga ish-kryetari i Bashkisë së Fushë-Arrëzit!

Dëmi përllogaritet deri në 234 milionë lekë

Hapën rrugë të re duke shkatërruar pyllin

Ish-kryetari i Bashkisë së Fushë-Arrzit, Fran Tuci, u arrestua me urdhër të SPAK (Prokuroria e Posaçme Kundër Korrupsionit dhe Krimit të Organizuar). Ai është akuzuar për shpërdorim detyre për shkak të abuzimeve të dyshuara me tenderin e një rruge. Në pranga ra gjithashtu administratori i njësisë së Iballë në Pukë, Ndoc Marku, për shpërdorim detyre, ndërsa në kërkim u shpall biznesmeni Durim Markgjekaj, i akuzuar për shkatërrim të pronës.

Hetimet kanë treguar se në territorin administrativ të Bashkisë Fushë-Arrz është hapur një segment i ri rrugor, në kundërshtim me ligjin, duke shkaktuar dëme të konsiderueshme në fondin pyjor të kësaj bashkie. Vlera e dëmit të përllogaritur nga IKMT Shkodër është 234,007,500 lekë. Ish-kryetari Tuci, në bashkëpunim me ish-administratorin Marku, ka lejuar hapjen e këtij segmenti rrugor, i cili nuk ishte miratuar nga autoritetet kompetente.

SPAK thekson se punimet për hapjen e rrugës janë kryer nga Durim Markgjekaj, i cili ka shkaktuar shkatërrimin e pronës dhe shpyllëzimin e fondit pyjor pa leje nga organet kompetente. Arrestimi i Fran Tucit erdhi pas arrestimit të vëllait të tij Albert Tuci në vitin 2020 në kuadër të operacionit antidrogë “Shën Mëri 2020”.

Fran Tuci u zgjodh kryetar i Bashkisë Fushë-Arrëz në zgjedhjet lokale të vitit 2015, përfaqësues i Partisë Socialiste dhe i Aleancës për Shqipërinë Evropiane. Opozita kishte kërkuar shkarkimin e tij pas arrestimit të vëllait. Masat e sigurimit të caktuara janë ekzekutuar nga Policia Gjyqësore në Drejtorinë e Përgjithshme të Policisë së Shtetit në datat 12 dhe 13 korrik 2023. Hetimet e vazhdojnë për të zbardhur plotësisht rrethanat e rasteve të akuzave për shpërdorim detyre dhe shkatërrim të pronës.