Komandot amerikane e kanë një plan për lirimin e pengjeve të Hamasit

Nga Herbert Bauernebel, BILD

Tunele të shumta, kurthe me mina, prita- izraelitët mund të përdorin çdo ndihmë në kërkimin për 240 pengjet e rrëmbyera nga trupi terrorist Hamas.

Tashmë është bërë e ditur se komandot amerikane janë në vendin e shkatërruar nga lufta.

Ushtarët elitë nuk supozohet të marrin pjesë vetë në përparimet në Rripin e Gazës- por ata po mbështesin ushtrinë e Izraelit me zbulim, logjistikë dhe ekspertizë. Dy duzina qytetarë amerikanë thuhet se janë ndër pengjet e rrëmbyera në Gaza në sulmin terrorist nga vrasësit gjakatarë të Hamasit më 7 tetor.

‘New York Times’ raporton se Pentagoni ka zhvendosur disa dhjetëra luftëtarë komando amerikanë në Izrael gjatë ditëve të fundit. “Ne po i ndihmojmë në mënyrë aktive izraelitët,” tha zyrtari i lartë i Pentagonit, Christopher Maier, i cili është përgjegjës për operacionet speciale. “Ne po punojmë për identifikimin e pengjeve, përfshirë pengjet amerikane- kjo është pjesë e punës tonë”.

Megjithatë, Pentagoni ka heshtur në lidhje me cilat njësi janë stacionuar dhe cili është misioni i tyre ekzakt.

‘Seal Team Six’ u bënë të famshëm pasi vranë Osama Bin Laden

Më parë ishte spekuluar nëse komandot nga njësitë elitare Delta Force dhe Navy SEAL mund të ishin në vend. Njësia Seal Team Six u bë legjendare në vitin 2011 kur terroristi kryesor i 11 shtatorit, Osama Bin Laden, u eliminua pasi sulmuan strehën e tij në Pakistan.

Në përgjithësi, komandot duhet të jenë aktivë në një rol mbështetës në kërkimin e pengjeve: ushtria amerikane, së bashku me FBI-në dhe njësinë e shpëtimit të pengjeve nga Departamenti i Shtetit, po ndihmojnë komandantët e ushtrisë izraelite.

Por, sipas Maier, nuk është planifikuar një përfshirje e trupave speciale amerikane në këto ‘operacione jashtëzakonisht komplekse’ në Gaza.

SHBA-të mbeten aleati kryesor i Izraelit: për të mbajtur nën kontroll Iranin dhe për të mbështetur Jerusalemin, dy flota aeroplanmbajtëse u zhvendosën nga Mesdheu lindor dhe u rritën dërgesat e armëve. Shefi i Pentagonit, Lloyd J. Austin dhe ministri i Mbrojtjes i Izraelit janë në komunikim çdo ditë. së fundmi, gjeneral brigade Pat Ryder njoftoi vendosjen e 300 ushtarëve shtesë amerikanë në Lindjen e Mesme.