SPAK ndalon gazetarin Elton Qyno, i kërkon të zbulojë burimet e informacionit

Prokuroria e Posaçme ka ndaluar këtë pasdite gazetarin Elton Qyno, pas disa shkrimeve që ky i fundit ka bërë në median ku punon.

Qyno ka nxjerrë detaje nga shumë dosje hetimore duke informuar publikun, SPAK ka urdhëruar ndalimin e tij, duke kërkuar burimet e tij të informacionit.

Skandali është se detyra e një gazetari është të nxjerrë çdo lloj informacioni dhe baza e gazetarisë është të mos publikohen burimet. Por SPAK duke mos qenë e fuqishme të zbulojë vetë se si i dalin të dhënat, ka urdhëruar të ndalohet gazetari dhe t’i ushtrohet presion që të tregojë burimet e tij.

Ndalimi i Qynos është në vazhdën e presioneve të mëparshme. SPAK në qershor të vitit të kaluar mori një vendim, duke i kufizuar gazetarit fjalën e lirë dhe duke e kërcënuar me burg. Prokurorët kërkuan që Qyno të ndalojë së publikuari të dhëna nga dosja hetimore e Nuredin Dumanit. “Ne mirëkuptojmë interesin e mediave për informimin e opinionit publik, por ky interes nuk mund  dhe nuk duhet të cenojë një hetim të filluar dhe as sigurinë publike apo individuale të personave emrat e të cilëve janë përmendura gjatë hetimit, i  cili  vazhdon”, shprehej SPAK.

Por duket se tani çmenduria e Prokurorisë ka shkuar deri aty sa të ndalojë gazetarin dhe të kërkojë burimin e informacionit të tij, duke shkelur çdo lloj norme dhe duke intimiduar median.