Basha në konferencë për gazetarët: “Berisha zgjodhi rrugën e tij, i kam thënë çfarë kam pasur”

Kryetari i Partisë Demokratike Lulzim Basha ka zhvilluar ditën e sotme një konferencë me gazetarët, ku ka deklaruar se ish-kryeministri Berisha ka zgjedhur rrugën e tij, edhe pse sipas tij ka qenë rruga e gabuar.

Basha u shpreh se i ka thënë ish-kreut të Qeverisë ” çfarë ka pasur për t’i thënë”, ndërsa theksoi se gjykimi i tij u errësua pas “asaj që i ngarkuan” duke iu referuar non-gratës nga Shtetet e Bashkuara.

Ai vijoi duke thënë se mbështetësit e Berishës “nuk kanë lënë gjë pa i thënë” dhe se nuk janë kujdesur për imazhin e tij për 10 vite si Basha, por përkundrazi e kanë përqeshur.

A ndjeni përgjegjësi se ju dhe Berisha jeni personat që po dëmtoni më shumë PD-në?

Basha: E kam dëgjuar këtë tezë që qarkullon nga një i tretë pasi nuk njeh PD zyrtare heq shenjën e barazimit, Berisha ka zgjedhur rrugën e tij, për arsyet e tij. Për mua ka qenë zgjedhja e gabuar, ja kam thënë. I kam thënë çfarë kam pasur për t’i thënë. Fajin më të madh nuk ia vë atij. Gjykimi i tij është errësuar pas asaj që i ngarkuan.

Një burrë shteti nuk duhet të bjerë pre e kësaj. Fajin më të madh e kanë ata që bënë sikur shkuan te PD sikur u digjte braku për të. Nuk kanë lënë gjë pa i thënë, edhe kur ishte kryeministër. Nuk shkuan atje për Berishën apo demokratët, por për veten e tyre. Kanë shkuar sepse besonin se ai stan kishte bulmet më të mirë, për egoizëm. Këto vendime i paguajnë demokratët. Sa jam kujdesur 10 vite për të ruajtur imazhin e tij, kur këta e përqeshnin, por ishte një moment kur duhet të zgjidhja mes mirënjohjes, për të cilën kam qenë peng, dhe nevojës për të ecur përpara në shtëpinë e demokratëve”, u shpreh Basha.

Kreu i PD ndër të tjera ka folur edhe për mungesën në Parlament në seancën që u hoq imuniteti për ish-kryeministrin, Sali Berisha, ku tha se Parlamenti nuk funksionon si i tillë dhe nuk mund të shkonin në sallë vetëm për të ngritur dorën, por duhet të thonin edhe mendimet e tyre.

“Vendimi i PD i qartë, për këdo të kërkohet heqja e imunitetin do e votojmë, Alibeaj ishte në komision dhe e bëri të qartë vendimin. Në e dimë që Parlamenti nuk funksionon si i tillë. Atë ditë situata ishte e rënduar dhe shkoi ashtu si shkoi. Ne nuk mund të shkonim vetëm për të ngritur duart, por për të thënë edhe mendimet tona”, tha Basha.

I pyetur për mungesën e gjatë, Basha tha se 4 muajt e fundit kanë qenë intensive për të  dhe për PD, ku është punuar për riorganizimin e partisë, hartimin e programit që është fazën e konsultimit me partnerët ndërkombëtarët, ndërsa ka theksuar faktin se ka qenë vetë personalisht në mbi 250 takime anembanë për të lidhur telat e këputura.

“Nuk i lidh ngjarjet me njëra tjetrën. 4 muajt e fundit, kanë intensiv për mua dhe PD. Kuvendi, riorganizimi partisë, hartim i programit, i cili ndodhet në fazën e konsultimit me partnerët si dhe një sërë angazhimesh të tjera në rafshin ndërkmbëtar. Kam qenë në mbi 250 takime anembanë takime, për të lidhur telat e këputura” shtoi ai.