Thirrja e deputetëve të opozitës së bashkuar për protestën e 20 Shkurtit

🎥Në video bëjnë thirrje të gjithë deputetët e PD-së për tu bërë bashkë në protestën e 20 shkurtit.

Në video bëjnë thirrje të gjithë deputetët e PD-së për tu bërë bashkë në protestën e 20 shkurtit.

Ditën e nesërme, e martë 20 shkurt, opozita ka thirrur protestë kundër qeverisë dhe pritet që tubimi të nisë në orën 17:30 para Kryeministrisë.

Mësohet se në protestë, ish-kryeministri Sali Berisha, i cili ndodhet në arrest shtëpie, do të jetë  ‘prezent’ përmes një videomesazhi, i cili ose do të jepet live ose do të jetë me regjistrim.

Gjithashtu mësohet se opozita ka marrë leje në polici për rreth 5 orë për zhvillimin e protestës.

Kujtojmë se gjatë paradites së sotme, policia njoftoi dhe planin e masave për mbarëvajtjen e tubimit.

Për protestën do të angazhohen 1100 efektivë policie, duke nisur nga ato të rendit, FNSH, Shqiponjat dhe Garda e Republikës, ndërsa RENEA do të jetë në gatishmëri. Gjithashtu do të ketë dhe autobote uji, ndërsa njoftohet dhe për një kordon me efektivë policie para kryeministrisë dhe perimetrit rreth saj.

Dyert e Kryeministrisë do të jenë të blinduara me veshje metalike, ndërsa përgjatë gjithë bulevardit ‘Dëshmorët e Kombit’ janë instaluar kamera me rezolucion të lartë.

Dy orë para nisjes së protestës dhe deri në përfundim të saj, segmentet rrugore që do të bllokohen janë: Bulevardi “Dëshmorët e Kombit”, sheshi “Nënë Tereza”, rruga “Ismail Qemali”, nga kryqëzimi i rrugës së Elbasanit me rrugën “Ibrahim Rugova”, rruga “Papa Gjon Pali II”, bulevardi “Zhan D’Ark” dhe bulevardi “Bajram Curri”, nga kryqëzimi i Rrugës së Elbasanit me rrugën “Ibrahim Rugova”.

Partia Demokratike u ka bërë thirrje të gjithë qytetarëve që me datën 20 shkurt të jenë në shesh në protestën kundër narkoqeverisë.

Kryetari i Partisë Demokratike, Sali Berisha ka theksuar që në 20 shkurt të gjithë qytetarët të zbresin në Tiranë, pasi kjo ditë është vendimtare për të shpëtuar demokracinë, lirinë dhe Shqipërinë.