Një person ka vdekur dhe disa të tjerë janë plagosur në një fluturim të Singapore Airlines nga Londra që u godit nga turbulenca të forta.
Boeing 777-300ER me destinacion Singaporin u devijua në Bangkok dhe u ul në orën 15:45 lokale. Fluturimi “SQ 321” mbante gjithsej 211 pasagjerë dhe 18 anëtarë të ekuipazhit, tha linja ajrore në një deklaratë, raporton “BBC”.
“Singapore Airlines i ofron ngushëllimet më të thella familjes së të ndjerit”, thuhet në njoftim.
Linja ajrore shtoi se po punonte me autoritetet tajlandeze për të ofruar ndihmë mjekësore për pasagjerët dhe po dërgonte një ekip në Bangkok për të ofruar çdo ndihmë shtesë të nevojshme.
Autoritetet tajlandeze kanë dërguar ambulanca dhe ekipe emergjente në aeroportin Suvarnabhumi.
Turbulenca është një fakt i fluturimit – megjithatë incidente të rënda si ky janë të rralla.
