A mban ndopak përgjegjësi kryeministri Rama për ish-deputetin Jurgis Cyrbja?

Sot që  Jurgis Cyrbja, ish-deputeti socialist dhe drejtuesi i mëparshëm i Hipotekës së Durrësit, u mor zyrtarisht i pandehur nga SPAK për shpërdorim detyre, pyetja që duhet ngritur është: a duhet të mbajë përgjegjësi kryeministri Edi Rama për këtë skandal?

Cyrbja, i cili hyri në parlament nën siglën e Partisë Socialiste në 2017, është akuzuar për katër praktika pronash të firmosura në 2016, ndërkohë që drejtonte Hipotekën e Durrësit. Megjithëse hetimi nisi pas kallëzimit të Partisë Demokratike, ky rast reflekton thellësinë e problemeve me drejtimin politik dhe moral të deputetëve të PS-së.

Por çfarë ndodh kur jo vetëm Lefter Koka por edhe Cyrbja me shokë  që u  zgjedhon si përfaqësues në parlament, me mbështetje të fortë nga lidershipi i partisë, rezultojnë të përfshirë në abuzime të tilla dhe të lidhura me banditë për të mbledhur vota ? Rama, i cili ka qenë edhe në listën e  deputetëve të Durrësit dhe ka drejtuar çdo detaj të emërimeve të tij, duhet të paktën të kërkoj falje publike në platformën “X” apo në FB  mbi përgjegjësinë që i takon.

Për më tepër, largimi i Cyrbjas nga mandati i tij dy ditë pas marrjes në pyetje nga SPAK është një tjetër shenjë e heshtur e ndërlidhjeve të errëta mes politikës dhe abuzimit me pushtetin.

A është ky një akt i detyruar nga presioni publik, apo një përpjekje për të shmangur përballjen e plotë me përgjegjësinë?

Rama të paktën  duhet edhe formalisht sa për sy e faqe të shkruajë dy radhë me një qëndrim për deputetin Cyrbja me akuzë zyrtare nga SPAK.