Besart Xhaferri: Fushata e PD-së drejtohet nga Chris LaCivita, strategu i fitores së Trump

Programi ynë ka mbështetjen e Heritage dhe Konrad Adenauer

Kandidati për deputet i Partisë Demokratike, Besart Xhaferri, ka zbuluar detaje të rëndësishme mbi prapaskenat e fushatës së opozitës, duke konfirmuar se strategjia e PD-së po drejtohet nga Chris LaCivita, ish-strategu i fitores së presidentit amerikan Donald Trump.

Në një intervistë të dhënë për mediat, Xhaferri theksoi se “strategjia serioze dhe ndërkombëtare” e opozitës është kundërpërgjigjja e vërtetë ndaj propagandës së mazhorancës, që sipas tij po përpiqet të imponojë idenë e një disfate të garantuar për PD-në.

“Arma e fundit e pushtetit është pikërisht kjo: të krijojë klimën e një fushate të humbur. Ne po ndërtojmë realisht alternativën që do rikthejë besimin te shqiptarët dhe do sjellë kthesën e madhe politike,” – u shpreh Xhaferri.

Ai bëri të ditur se programi i Partisë Demokratike është hartuar në bashkëpunim me dy prej fondacioneve më me ndikim në botë, Heritage Foundation dhe Konrad Adenauer Stiftung, duke e cilësuar këtë si një garanci për seriozitetin dhe vlerën e platformës opozitare.

Për sa i përket strategjisë së fushatës, Xhaferri tregoi se Chris LaCivita është në kontakt të përditshëm me PD-në, edhe pse fizikisht nuk ndodhet gjithmonë në Shqipëri:

“Kemi pesë persona në krye të komponentëve kryesorë të fushatës: strategjia, imazhi, programi dhe ‘war room’. Në kohën e teknologjisë, vendndodhja nuk ka rëndësi. LaCivita është gjithmonë prezent dhe drejton nga afër.”