Shkak mesazhi që i dërgoi Ramës

Një ngjarje shqetësuese ka ndodhur mbrëmjen e djeshme rreth orës 22:30 në ambientet e kompleksit “Delijorgji” në Tiranë. Burime për Publik.al bëjnë me dije se Laert Kasaj, pronari i restorantit “Tokyo”, është dhunuar në mënyrë barbare nga disa persona, të cilët dyshohet se janë të lidhur me barin “Stockholm”, që ndodhet përballë.

Sipas dëshmive të mbërritura në redaksinë tonë, motivi i këtij sulmi lidhet me një denoncim që Kasaj i ka bërë personalisht kryeministrit Edi Rama, lidhur me uzurpimin e hapësirave publike dhe përdorimin e paligjshëm të tendave nga lokalet përreth kompleksit.

Duket se ky akt qytetar, që synonte kthimin e hapësirave publike te komuniteti, është kthyer në një arsye për përgjakje. Pas denoncimit, Kasaj është sulmuar me grushte e sende të forta, duke përfunduar në spital në gjendje të rënduar. Sipas të njëjtave burime, ndërhyrja e Policisë së Shtetit ka ardhur vetëm pas ngjarjes, ndërsa të dhunuesit janë larguar nga vendngjarja.

Deri në momentin e publikimit të këtij lajmi, nuk ka asnjë deklaratë zyrtare nga Policia e Shtetit dhe as ndonjë informacion mbi identifikimin dhe ndalimin e autorëve të dyshuar.