Detaje nga dhunimi i TikTokerit ‘Diamanti Blu’ në Larisa

Autorët morën 70 mijë euro për eliminimin e tij, në kërkim ndërkombëtar Agron Zeqo

Detaje të reja kanë dalë në dritë lidhur me ngjarjen e rëndë që tronditi Larisën e Greqisë, ku TikTokeri i njohur si Diamanti Blu u dhunua brutalisht gjatë një darke me miqtë e tij.

Autori kryesor në kërkim ndërkombëtar

Një nga autorët kryesorë të dhunës është shpallur në kërkim ndërkombëtar. Bëhet fjalë për Agron Zeqo, 36-vjeç, i njohur në rrjete sociale me pseudonimin “Aroni”. Autoritetet shqiptare dhe ato greke e cilësojnë atë si person me rrezikshmëri të lartë dhe kanë vendosur shpërblim për këdo që jep informacion që çon në kapjen e tij.

Si ndodhi ngjarja në Larisa

Ngjarja ndodhi gjatë një darke që Diamanti po konsumonte me miqtë e tij. Sipas hetimeve, para lokalit mbërritën tre automjete. Disa persona qëndruan jashtë, ndërsa njëri prej tyre hyri brenda dhe u ul në tavolinë – moment që u pa edhe nga transmetimi “live” që TikTokeri po bënte.

Pasi videoja u ndërpre, filloi dhuna brutale ndaj Diamantit dhe shokëve të tij. Ai, një kushëri nga Berati dhe një tjetër mik përfunduan në spital, ndërsa autorët u larguan me shpejtësi. Hetuesit grekë dyshojnë se sulmi ishte i planifikuar prej kohësh dhe se autorët kishin marrë 70 mijë euro pagesë për eliminimin e tij. Për fat, Diamanti i mbijetoi sulmit.

Konfliktet e mëparshme me “Aronin”

Diamanti kishte patur më herët konflikte me Agron Zeqon. Ky i fundit, i njohur për publikimin e videove të dhunës në rrjete sociale, e kishte kërcënuar më parë duke i thënë se do t’i digjte banesën në Çinar. Pak ditë më pas, lokali i Diamantit u sulmua dhe i shkaktoi dëme të mëdha. Personat e arrestuar për këtë ngjarje kanë deklaruar se pas tyre qëndronte pikërisht Aroni.

Një individ i rrezikshëm në pesë shtete

Burime të tjera bëjnë me dije se Aroni është në kërkim në pesë shtete të ndryshme dhe konsiderohet si një individ i rrezikshëm për rendin publik. Autoritetet u bëjnë thirrje qytetarëve që nëse kanë informacion mbi vendndodhjen e tij, të kontaktojnë menjëherë me policinë.