Gabimi “Diellor” i Ramës me mbiemrin e aktorit

Në një prej atyre momenteve kur edhe “Diella”, inteligjenca artificiale e qeverisë, duket se e ka lënë në baltë, faqja zyrtare e kryeministrit Edi Rama bëri një gafë që nuk i shpëtoi askujt: mbiemri i aktorit të ndjerë Enver Petrovsci u shndërrua në… Petrofski!

Fillimisht postimi u shfaq me mesazhin solemn për aktorin “e jashtëzakonshëm, njeri i dashur”, por me mbiemrin e deformuar. Disa minuta më pas, versioni i dytë u shfaq i korrigjuar, por screenshot-et e “gabimit të Diellës” tashmë kishin bërë xhiron e rrjeteve.

“Diella”, supersofti që supozohet të menaxhojë gjithçka nga tenderat te postimet e kryeministrit, duket se ka vendosur të bëjë humor të zi në një ditë zie. Rrjetet sociale e pritën me shaka: nga “gafa e parë zyrtare e Diellës” te batuta se “Diella po konkurron për vendin e parë në rubrikën ‘lapsuse të javës’”.

Një kujtesë se, edhe në epokën e inteligjencës artificiale, një sy njerëzor për kontroll mbetet më i besueshëm se çdo “Diell” digjital.