Ekspertiza italiane zbardh rastin e Brian Spahiut

Ekspertiza e kërkuar në Itali për vdekjen e 3-vjeçarit Brian Spahiu ka mbërritur në Prokurorinë e Tiranës. Dokumenti voluminoz, që përcakton shkakun e vdekjes së të miturit, po analizohet nga prokurorja e çështjes dhe pritet të mbyllë fazën hetimore.

Brian Spahiu ndërroi jetë më 1 tetor 2023 në reanimacionin e pediatrisë në QSUT, tre ditë pas një ndërhyrjeje dentare në klinikën private të mjekut Roland Xhaxho. Për këtë ngjarje, në hetim në gjendje të lirë janë mjeku Xhaxho dhe vajza e tij Ina, të akuzuar për “neglizhencë në trajtim mjekësor”.

Familja e 3-vjeçarit fajëson klinikën për mbidozë narkoze dhe për ndërhyrje të pajustifikuar, duke thënë se djali ishte dërguar vetëm për pastrim gurëzash, por iu krye punim në 14 dhëmbë.