Altin Bojni, kandidati i PS për zgjedhjet në Mat

Partia Socialiste ka shpallur Altin Bojnin si kandidatin e saj për kryetar bashkie në Mat, në zgjedhjet e pjesshme të 9 nëntorit.

Bojni mban aktualisht postin e kryetarit të Këshillit Bashkiak dhe drejtorit të NJVKSH Mat, ndërsa vjen me një formim akademik në fushën e ekonomisë. Ai u prezantua nga strukturat socialiste si një figurë e re politike, me vizion zhvillimi dhe lidhje të konsoliduara me PS-në në nivel lokal.

Socialistët e cilësojnë kandidaturën e tij si një përfaqësim të brezit të ri, që sipas tyre, synon të japë energji të re në drejtimin e bashkisë.

Zgjedhjet e pjesshme për kryetar bashkie në Mat pritet të zhvillohen paralelisht me ato në Tiranë, Vlorë, Tepelenë, Cërrik dhe Berat, duke e bërë 9 nëntorin një test të rëndësishëm elektoral për të gjitha forcat politike.