Sa para u mblodhën? Mbyllet faqja në GoFundMe për Elvis Shkambin

Më 8 tetor, vetëm dy ditë pas vrasjes së gjyqtarit Astrit Kalaja në sallën e Apelit, një familjar i familjes Shkambi hapi një faqe në GoFundMe për të kërkuar ndihma financiare nga shqiptarët, me qëllim mbulimin e shpenzimeve për avokatin. Qëllimi i Françesk Shkambit ishte të siguronte 20 mijë dollarë, shifër që u afrua shumë, pasi deri më 10 tetor ora 11:30, shqiptarët kontribuan mbi 14 mijë dollarë. Shumica e donacioneve erdhën nga persona me emra, por pati edhe kontribues anonimë. Aktualisht, faqja në platformë është mbyllur.

Personi që pretendonte se ishte familjar i Elvis dhe Gjon Shkambit, ka shpërndarë në platformë një mesazh ku shprehej në emër të familjes. Në këtë mesazh, familja Shkambi fillon me ngushëllime për familjen e gjyqtarit Kalaja dhe me një kërkesë falje ndaj babë e bir, Ragip dhe Ervis Kurtaj, të plagosur në atë ngjarje. Ata theksojnë se as Elvisi as Gjoni nuk kanë shprehur kurrë qëllim për të sulmuar me armë drejtësinë, edhe pse pretendojnë se janë gjykuar padrejtësisht.

Në mesazh thuhet se asgjë nuk justifikon humbjen e jetës, por sistemi i drejtësisë është i tillë që i lë familjet shqiptare në dëshpërim, sidomos në konflikte të gjata ligjore për të drejtat e pronës.

Nuk dihet nëse Françesk Shkambi është vërtet familjar i të akuzuarve, apo nëse mesazhi është realisht nga familja Shkambi.

Mesazhi i shpërndarë në GoFundMe:

Familja Shkambi shpreh dhimbje të thellë për këtë humbje shkatërruese dhe përcjell ngushëllimet më të sinqerta për familjen e gjyqtarit Kalaja, duke vajtuar vdekjen e pakuptimtë të një nëpunësi publik të përkushtuar. Gjithashtu, kërkon falje të sinqerta për Ragip dhe Ervis Kurtajn për plagët e pësuara dhe u uron shërim të plotë dhe të shpejtë.

Ata theksojnë se kjo tragjedi nuk është diçka që Elvis apo Gjon Shkambi ndonjëherë e kanë dëshiruar apo shprehur. Besojnë se anëtarët e tyre kanë vuajtur për vite nga keqtrajtimet, gjykimet e gabuara dhe vonesat në sistemin e drejtësisë, por nënvizojnë se një përfundim i tillë nuk ka qenë kurrë qëllimi i tyre.

Familja Shkambi shpreson që qeveria shqiptare të shqyrtojë me kujdes këtë rast dhe të sigurojë që askush tjetër të mos vuajë pasojat e veprimeve dhe gabimeve të bëra gjatë këtij konflikti.

Kjo tragjedi kërkon reforma urgjente në sistemin gjyqësor — zgjidhje më të shpejta të çështjeve, siguri më të fortë në gjykata dhe mekanizma të qartë për zgjidhjen e mosmarrëveshjeve të pronësisë pa e vënë popullin kundër njëri-tjetrit.

Bashkimi Evropian dhe SHBA, si mbështetës kryesorë të reformave të vitit 2016 në Shqipëri, duhet të ndihmojnë në realizimin e këtyre ndryshimeve për të parandaluar dëshpërime të tjera.

Shqipëria ndodhet në një udhëkryq.

Dështimet e sistemit të drejtësisë — që ushqyen mosbesimin dhe çuan në këtë tragjedi — duhet të adresohen. Le të jetë kjo një pikë kthese drejt një sistemi ku mosmarrëveshjet mbyllen me zgjidhje, jo me shkatërrim.

Bëjmë një thirrje urgjente për reforma në sistemin gjyqësor shqiptar, në mënyrë që asnjë familje apo i ri — si Elvis Shkambi — të mos shtyhet më kurrë në dëshpërim për shkak të dështimeve sistemike. Askush nuk duhet të përjetojë dhimbjen, padrejtësinë dhe pashpresën që çuan në këtë ngjarje tragjike.