Ironia e Redi Muçit: Po vazhduat kështu, pyetjet do i bëjë Diella

Deputeti i Lëvizjes Bashkë, Redi Muçi, gjatë seancës plenare të sotme, kritikoi ashpër vendimin për të mos lejuar pyetjet e opozitës në Kuvend, duke e cilësuar këtë si një precedent të rrezikshëm për demokracinë parlamentare.

Sipas Muçit, kufizimi i së drejtës për të bërë pyetje bie ndesh me parimet bazë të lirisë së fjalës dhe transparencës.

“Çfarë po ndodh është e palogjikshme. Situata do të ishte për të qeshur, nëse nuk do të krijonte një precedent kaq të rrezikshëm për mohimin e të drejtës për të bërë pyetje,” deklaroi ai.

Deputeti shtoi me ironi se me këtë qasje, Kuvendi mund të shkojë deri në absurditet:

“Mund të vijë dita që edhe në komisione të na ndalohen pyetjet, apo t’i shtrojë pyetjet Inteligjenca Artificiale të na dalë Diella aty e të flasë në vendin tonë.”

Muçi paralajmëroi se kjo praktikë dëmton seriozisht lirinë e fjalës në Parlament:

“Kjo është një rrugë e rrezikshme që prek vetë themelin e fjalës së lirë dhe të debatit demokratik,” përfundoi ai.