Detajet/ Si pritet të vendoset sot Shqipëria përballë Andorrës

Shmangia e turpërimeve është e vetmja ambicie që i ka mbetur Andorrës, ndërsa Shqipëria kërkon fitoren e artë që mund ta çojë drejt Botërorit 2026.
Në “Estadi de la FAF”, kuqezinjtë e Sylvinhos zbresin në fushë për t’i dhënë formë ëndrrës që gjithë tifozët kanë pritur — një vend mes më të mirëve të planetit.

Skuadra e Koldo Alvarez nuk ka aspak pretendime për kualifikim, por pritet të kërkojë të ruajë nderin. E pabesueshme, por Andorra ka arritur t’i shkaktojë vështirësi Anglisë në dy përballje dhe nuk ka pësuar humbje me më shumë se tre gola në shtatë ndeshje. I vetmi rezultat pozitiv deri tani është një barazim 2-2 me Letoninë.

Gjithsesi, pas gjashtë ndeshjeve pa gol, andorrenët kanë filluar të marrin frymë, me tre realizime në dy takimet e fundit — sinjale inkurajuese për vendasit, që megjithatë përballen me një Shqipëri të etur për gjak fitoreje.

Kuqezinjtë kërkojnë historinë

Ekipi i Sylvinhos vjen me moral të lartë, pas katër fitoreve radhazi — dy në grup ndaj Letonisë e Serbisë, dhe dy të tjera miqësore ndaj Jordanisë e Gjibraltarit.
Kualifikimi është më pranë se kurrë: Anglia është e paarritshme, por Shqipëria mban vendin e dytë me një pikë më shumë se Serbia, dhe me një fitore ndaj Andorrës, play-off-i bëhet realitet.

Në ndeshjen e marsit, kuqezinjtë fituan 3-0 ndaj andorrenëve, duke zgjatur serinë triumfuese ndaj tyre në 3 fitore radhazi dhe një pamposhtësi që zgjat prej vitit 2002.

Formacionet dhe mungesat

Andorra vuan mungesa të rëndësishme: Joel Guillen, Eric Vales dhe Christian Garcia janë jashtë për shkak kartonësh, ndërsa veterani Marc Vales nuk është përfshirë.
Në fushë, përvojën do ta udhëheqë Moises San Nicolas me 95 paraqitje.

Në kampin kuqezi, Sylvinho ka thuajse grupin e plotë, me mungesën e vetme të Marash Kumbullës.
Në sulm pritet të startojë Rey Manaj, me Armando Brojën ende jashtë ritmit pas minutazhit të kufizuar te Burnley.
Elseid Hysaj pritet të shënojë rekordin e tij të 95-të ndeshjeve me fanellën kuqezi.

Formacionet e mundshme

Andorra (4-5-1): Gomes; Borra, Olivera, Llovera, Garcia, San Nicolas; Rosas, Babot, Rebes, Cervos; Lopez.
Shqipëria (4-3-3): Strakosha; Hysaj, Ajeti, Djimsiti, Mitaj; Asllani, Ramadani, Laçi; Bajrami, Manaj, Uzuni.