Çfarë do ndodhë nga e hëna? Berisha bën paralajmërimin e fortë

Kryetari i Partisë Demokratike, Sali Berisha, ka njoftuar se të hënën opozita do të nisë atë që ai e quan “platforma parlamentare”, një formë e re proteste që do të zhvillohet përpara godinës së Kryeministrisë.

Në një postim në Facebook, ish-kryeministri shpjegon se kjo lëvizje vjen si pasojë e, sipas tij, mungesës së debatit në Kuvend, ku qeveria miraton programin dhe buxhetin pa diskutim real.

Berisha thotë se nisma synon t’i krijojë opozitës hapësirën që, sipas tij, i mungon në parlament.

“Sot Partia Demokratike hedh hapin më të rëndësishëm kundër atij që e quaj ‘narkoparlament i kontrolluar nga Ramaduro’. Fillojmë platformën parlamentare përpara Kryeministrisë! Kjo është e vetmja rrugë që na mbetet, në një kohë kur parlamenti kalon qeverinë, programin dhe buxhetin pa debat, dhe opozita lejohet të flasë vetëm një herë në nëntë seanca”, shkruan Berisha.