Dalin PAMJET! Burri tenton të vrasë gruan në Durrës (VIDEO)

Një ngjarje e rëndë ka tronditur qytetin e Durrësit, ku një 76-vjeçar ka tentuar të vrasë bashkëshorten e tij duke e sulmuar me një shkop druri. Episodi i dhunshëm ka ndodhur në lagjen nr. 17, dhe është regjistruar nga kamerat e sigurisë.

Në pamje shihet momenti kur i moshuari ndjek 70-vjeçaren me shkop në dorë, ndërsa ajo përpiqet të shpëtojë duke zbritur me vrap shkallët e banesës. Sipas të dhënave paraprake, konflikti mes çiftit dyshohet se ka nisur për motive të dobëta.

I moshuari, me inicialet A. R., dyshohet se e ka goditur të shoqen F. D., 70 vjeçe, me një shkop druri në kokë, duke i shkaktuar dëmtime të rënda. Viktima u transportua me urgjencë në Spitalin e Traumës në Tiranë, ku po merr ndihmën e nevojshme mjekësore.

Njoftimi i policisë:

Durrës/ Tentoi të vriste bashkëshorten duke e plagosur rëndë me një send të fortë, vihet në pranga menjëherë nga Policia 76-vjeçari.

Shërbimet e Komisariatit të Policisë Durrës, me marrjen e njoftimit për një rast dhune në familje në lagjen nr. 17, kanë shkuar menjëherë në adresën e dhënë, duke bërë të mundur parandalimin e përshkallëzimit të mëtejshëm të dhunës me pasoja të rënda për jetën.

Në vijim të veprimeve, në bashkëpunim me Specialistët për Hetimin e Krimeve ndaj Personit në Drejtorinë Vendore të Policisë Durrës, arrestuan në flagrancë shtetasin A. R., 76 vjeç, autorin e dyshuar të ngjarjes.

Nga veprimet e para hetimore rezultoi se 76-vjeçari, gjatë një konflikti për motive të dobëta, në banesë, ka ushtruar dhunë fizike ndaj bashkëshortes së tij, shtetases F. D., 70 vjeçe, duke e goditur me send të fortë (shkop druri) në kokë. Ndërhyrja e menjëhershme e Policisë parandaloi përshkallëzimin e dhunës me pasoja të rënda për jetën.

Si pasojë e goditjeve, 70-vjeçarja ka pësuar dëmtime të rënda fizike dhe u transportua menjëherë në Spitalin e Traumës Tiranë, për ndihmë mjekësore.

Grupi hetimor, nën drejtimin e Prokurorisë, vijon punën për sqarimin e plotë të rrethanave të ngjarjes.