Rritet paga minimale në Kosovë, ja sa do shkojë në korrik

Kosova do të hyjë në vitin 2026 me një pagë minimale dukshëm më të lartë. Nga muaji i ardhshëm, paga minimale do të jetë 425 euro bruto, nga 350 euro që është aktualisht. Rritja do të vijojë edhe më tej: nga 1 korriku 2026 nis faza e dytë e zbatimit, ku paga minimale do të ngjitet në 500 euro.

Kjo është rritja e parë e madhe pas shumë vitesh stagnim. Kryeministri në detyrë, Albin Kurti, e rikujtoi vendimin pak ditë para zgjedhjeve të parakohshme, duke theksuar se masa prek drejtpërdrejt rreth 150 mijë punëtorë të sektorit privat.

“Nga muaji i ardhshëm paga minimale bëhet 425 euro bruto nga 350 euro. Kurse nga 1 korriku fillon zbatimi i fazës së dytë ku paga minimale bëhet 500 euro”, deklaroi Kurti.

Qeveria e miratoi vendimin më 31 tetor, duke argumentuar se rritja e kostos së jetesës dhe inflacioni i viteve të fundit e kanë bërë të domosdoshme përshtatjen e pagës me realitetin ekonomik. Sipas ekzekutivit, kjo rritje do të ndikojë pozitivisht në fuqinë blerëse dhe në standardin e jetesës së punëtorëve, por edhe në formalizimin e tregut të punës.

Kurti kujtoi se, para se të hynte në fuqi Ligji i ri, paga minimale në Kosovë ishte vetëm 130 euro për punëtorët nën 35 vjeç dhe 170 euro për ata deri në 65 vjeç — nivele më të ulëta se në çdo vend tjetër të Evropës.

“Pagën minimale e gjetëm 130/170 euro, të pandryshuar për më shumë se një dekadë, dhe brenda një mandati po e rrisim për të tretën herë”, theksoi ai.

Aktualisht Kosova ka pagën minimale më të ulët në kontinent, ndërsa Luksemburgu kryeson me 2.571 euro.