Plagosja në Mamurras, identifikohen autorët (EMRAT)

Policia e Lezhës ka zbardhur plagosjen e ndodhur pasditen e së mërkurës në Mamurras të Kurbinit, ku u qëllua me armë zjarri 51-vjeçari Marketin (Pjetër) Marku.

Autoritetet kanë identifikuar dhe shpallur në kërkim dy të rinj, 18-vjeçarët Roeni Noka dhe Oligert Ndreca, banues në lagjen “Zef Hoti” në Mamurras.

Sipas hetimeve, ngjarja ka ndodhur pas një konflikti të çastit. 51-vjeçari, i cili sapo ishte kthyer nga Anglia, iu kishte kërkuar autorëve që të lëviznin me kujdes me makinë dhe të mos xhironin gomat para portës së tij. Kjo ka shkaktuar një debat mes tyre, ku njëri nga të rinjtë ka nxjerrë pistoletën dhe ka qëlluar dy herë drejt Markut.

Njëri nga plumbat e ka kapur në dorë 51-vjeçarin, i cili pasi mori ndihmën e parë në Urgjencën e Mamurrasit, u transportua në Spitalin e Traumës në Tiranë. Burimet mjekësore bëjnë me dije se ai ndodhet jashtë rrezikut për jetën.

Policia njofton se automjeti me të cilin autorët janë larguar është gjetur në banesën e Oligert Ndrecës dhe është sekuestruar si provë materiale.

“Punohet intensivisht për kapjen e dy shtetasve, si dhe për individualizimin e përgjegjësisë së tyre penale”, njofton Policia e Lezhës.