Ukrainë, Zelensky njofton takimin me Donald Trump

Një “vatër” e re tensioni në prapaskenën diplomatike lidhur me përpjekjet për t’i dhënë fund luftës në Ukrainë është ndezur nga një postim i presidentit të vendit, Volodimir Zelensky, në orët e para të mëngjesit të së premtes.

Në postimin e tij në platformën X, Zelensky deklaron se ekziston një marrëveshje për një takim me Donald Trumpin në “të ardhmen e afërt”, duke shtuar se “shumë gjëra mund të vendosen para Vitit të Ri”.

“Rustem Umerov më informoi për kontaktet e tij të fundit me palën amerikane. Nuk humbim asnjë ditë. Ramë dakord për një takim në nivelin më të lartë me presidentin Trump në të ardhmen e afërt. Shumë gjëra mund të vendosen para Vitit të Ri. Lavdi Ukrainës!”,shkroi Zelensky.

Ky postim vjen vetëm pak ditë pas zbulimit nga vetë Zelensky i një plani të ri me 20 pika, për të cilin thuhet se është dakordësuar mes SHBA-së dhe Ukrainës, si dhe pas komunikimit që ai pati të enjten me të dërguarit amerikanë Stiv Uitkof dhe Xhered Kushner.

Dokumenti i paraqitur nga Zelensky parashikon ngrirjen e frontit në vijat aktuale të kontaktit, pa ofruar megjithatë një zgjidhje të menjëhershme për çështjen delikate të territoreve të pushtuara nga Rusia, të cilat përbëjnë rreth 19% të territorit të Ukrainës.

Ndryshe nga versioni fillestar, dokumenti i ri anashkalon gjithashtu kërkesa të rëndësishme të Moskës, si tërheqjen e forcave ukrainase nga zonat e Donbasit që ato ende kontrollojnë dhe angazhimin ligjor të Kievit për të mos u anëtarësuar në NATO. Për këtë arsye, konsiderohet e pamundur që Rusia të pranojë propozimin e ri.

I pyetur mbi këtë çështje, zëdhënësi i Kremlinit, Dmitri Peskov, tha se Moska “po shqyrton qëndrimin e saj” dhe refuzoi të komentojë detajet.