Nga taksia te grabitja me armë: I riu terrorizon Fushë-Krujën

Pasditen e së hënës, një grabitje me armë zjarri është shënuar në një pikë karburanti në zonën e Fushë-Krujës, duke vënë në alarm policinë lokale.

Sipas informacioneve, një i ri që po lëvizte me një taksi ka kërcënuar me armë punonjësit e karburantit dhe ka marrë shumën e parave të xhiros ditore. Pas ngjarjes, ai ka braktisur mjetin dhe është larguar në drejtim të fshatrave përreth Fushë-Krujës.

Nga hetimet paraprake dyshohet se autori ka qenë i përfshirë në të paktën tre raste grabitjeje brenda pak orësh. Fillimisht, ai ka marrë një taksi në Tiranë, duke kërkuar të transportohej drejt Fushë-Krujës. Gjatë rrugës, sapo mjeti është afruar në zonën e Tapizës, i riu ka nxjerrë armën e zjarrit, ka kërcënuar taksistin dhe ka marrë drejtimin e automjetit, ndërsa shoferin e ka lënë në një zonë të izoluar, duke i marrë edhe paratë dhe telefonin celular.

Më pas, autori ka vijuar lëvizjen drejt një tjetër pike karburanti, këtë herë në afërsi të Milotit, ku sërish nën kërcënimin e armës ka grabitur xhiron ditore të punonjësit. Pas grabitjes, ai ka lënë mjetin pranë një xhamie në Fushë-Krujë dhe është larguar në këmbë.

Policia bën me dije se i riu është identifikuar dhe vijojnë kërkimet intensive për kapjen e tij. Ai rezulton person me precedent penal, i dënuar më parë për veprën penale të mashtrimit.