Pse rasti Peleshi po bën zhurmë tani?

Një denoncim publik, i pasqyruar edhe në media, ka rikthyer në qendër të debatit një nga skemat më të diskutuara të përfitimeve parlamentare: kompensimin e qirasë për deputetët. Një skemë që financohet nga buxheti i Kuvendit dhe që, në praktikë, shpesh ngre dyshime serioze mbi kriterin real të “nevojës”.

Në këtë valë reagimesh është përmendur edhe emri i kryetarit të Kuvendit, Niko Peleshi, duke nxitur pyetje të forta publike: kemi të bëjmë me respektim strikt të rregullores, apo me një praktikë që, edhe kur është formalisht e ligjshme, mbetet politikisht e padenjë?

Çfarë thotë rregulli zyrtar: qira vetëm për ata që s’kanë banesë në rrethin e Tiranës

Baza ligjore e kësaj skeme është Vendimi i Kuvendit nr. 114, datë 24.12.2014 “Për mënyrën e trajtimit të deputetëve”. Ky vendim përcakton se Kuvendi mbulon shpenzimet e strehimit në masën 35,000 lekë në muaj, por vetëm për deputetët që:

• nuk banojnë në rrethin e Tiranës;

• dhe paraqesin dokumentacion përkatës, përfshirë vërtetim nga Zyra e Regjistrimit të Pasurive se deputeti dhe personat në certifikatën familjare nuk disponojnë shtëpi banimi në rrethin e Tiranës, si dhe kontratë qiraje.

Pra, rregulli është i prerë: nëse deputeti ose familja e tij ka banesë në rrethin e Tiranës, përfitimi nuk duhet të ekzistojë.

Ku nis “zona gri”: dokumenti kundrejt realitetit

Në praktikë, skema lë hapësira për interpretime dhe shmangie. Banesat mund të rezultojnë të paregjistruara plotësisht, në bashkëpronësi, në emër të një familjari tjetër, ose me adresë të paqartë në deklarime.

Kjo është pika ku lind dyshimi kryesor: deklarimi “jam me qira” nuk është i mjaftueshëm, nëse nuk provohet qartazi mungesa e çdo prone banimi në rrethin e Tiranës, jo vetëm për deputetin, por edhe për familjen e tij.

Deklarimet e pasurisë: apartament 75 m², por pa qytet

Në deklarimin e interesave private për vitin 2022, të lidhur me familjen e Peleshit, rezulton se bashkëshortja, Amarda Peleshi, ka të regjistruar një apartament me sipërfaqe 75.00 m², i regjistruar më 26/09/2022, me burim trashëgimie. Në dokument, adresa shënohet thjesht “Shqipëri”, pa qytet apo zonë.

Ky fakt nuk e provon automatikisht se prona ndodhet në Tiranë, por krijon një pikë kritike verifikimi: nëse rezulton se ky apartament është në rrethin e Tiranës, përfitimi i kompensimit të qirasë do të binte ndesh me kriteret e vendimit të Kuvendit.

Pse rasti Peleshi po bën zhurmë tani

Sepse denoncimi nuk paraqitet si thashethem, por si pyetje e drejtpërdrejtë publike:
“A mendoni se nuk ka shtëpi në Tiranë?”

Në të njëjtën kohë, lista të publikuara në media në fund të vitit 2025 kanë nxjerrë në pah një praktikë të përhapur përfitimesh shtesë nga deputetët, përtej pagës mujore.

Me nisjen e Kuvendit të ri në shtator, deputetët kanë filluar të shfrytëzojnë favoret që u jep mandati për të marrë bonuse dhe financime shtetërore.

Siç rezulton nga dokumentet, përfitimet janë përtej pagës apo pagesave për pjesëmarrje në komisione. Veç kuotës për karburant apo telefon, përfaqësuesit e popullit kanë marrë nga paratë e qytetarëve edhe kompensim për qiratë e tyre në kryeqytet, apo edhe për kuponët me të cilët kanë nxjerrë pasaporta diplomatike.

Rimbursim pasaportash diplomatike (tetor)

Ani Dyrmishi
Arian Ndoja
Eno Bozdo
Erjon Mile
Kiduina Zaka
Klevis Balliu
Marjana Koçeku
Skënder Pashaj
Zeqine Çaushaj
Zija Ismailaj

Për këtë dokument kanë aplikuar 10 deputetë të rinj, por kuponin prej 75 eurosh e kanë blerë me fondet e Kuvendit dhe jo me paratë e tyre, ndonëse pagat për ta variojnë nga 3,000 deri në 3,500 euro.

Por kompensimi për pasaportat diplomatike nuk është i vetmi përfitim.

Të dhënat tregojnë se 13 deputetë paguajnë qiranë me para publike.

Pagesat për qiranë (Tetor)

Antoneta Dhima PS – 350 Euro
Fadil Nasufi PS – 350 Euro
Hatixhe Konomi PS – 350 Euro
Bledi Çomo PS – 116 Euro
Erion Mile PS – 350 Euro
Erjona Ismaili PS – 290 Euro
Genti Lakollari PS – 300 Euro
Ledina Alolli PD – 210 Euro
Ramion Kurti PS – 338 Euro
Zeqine Çaushi PS – 361 Euro
Niko Peleshi PS – 350 Euro
Gerta Bardeli PD – 350 Euro

Paga bazë e deputetëve është rritur ndjeshëm vitet e fundit, duke arritur në 2,250 euro neto. Krahas saj, ata përfitojnë pagesa shtesë për komisione parlamentare, 170 euro në muaj për telefoninë, 300–400 euro për karburant, si dhe dieta për udhëtime brenda dhe jashtë vendit.

Sipas të dhënave, vetëm gjatë muajit tetor dhe pa përfshirë pagat, shpenzimet për karburantin e deputetëve arritën në 44 mijë euro, ato për telefoninë në 19 mijë euro, dietat në 139 mijë euro, qiratë në 4 mijë euro, ndërsa pasaportat diplomatike kushtuan 750 euro.