Ku gaboi ajo? Gazetari zbërthen prapaskenat e shkarkimit të Spiropalit

Gazetari Ardit Rada ka komentuar ndryshimet e fundit në kabinetin qeveritar, ku u zëvendësua pothuajse gjysma e ministrave. Sipas tij, sinjalet për largimin e Elisa Spiropali nga posti i ministres së Jashtme ishin dhënë që më herët nga kryeministri Edi Rama.

Rada theksoi se një nga treguesit më të qartë ishte udhëtimi i Ramës në Washington për aktivitetin e Bordit të Paqes, ku kryeministri mori me vete ministrin Ervin Demo, dhe jo ministren e Jashtme. Sipas tij, ky veprim la të kuptohej se ndryshimet në diplomacinë shqiptare ishin tashmë në horizont.

Në analizën e tij, Rada u shpreh gjithashtu se emërimi i Ferit Hoxha në krye të Ministrisë së Jashtme përbën një përmirësim për diplomacinë shqiptare. Ai shtoi se zërat për një përplasje mes Spiropalit dhe Belinda Balluku nuk janë arsyeja reale e këtij vendimi politik.

Sipas gazetarit, lëvizjet e fundit të Spiropalit në skenën rajonale, veçanërisht takimet e shumta në Kosovo, mund të jenë perceptuar si një përpjekje për të rritur profilin e saj politik brenda qeverisë.

“Nuk besoj se ndryshimi i znj.Spiropali vjen për shkak të asaj që supozohet në media, që ka një luftë me znj.Balluku, por zgjedhja e Ferit Hoxhës në krye të ministrisë së Jashtme, vetëm e përmirëson ministrinë e Jashtme. Tani për znj.Spiropali, nëse doni një koment konkret, ishte e dukshme që kur Edi Rama shkoi në Bordin e Paqes në Uashington dhe me vete mori Ervin Demon. Që këtu duhet ta kishim kuptuar ne që nuk merret ministrja e Jashtme jashtë shtetit, por merret një ministër periferik i kabinetit qeveritar. Nga ana tjetër duhet ta kishit kuptuar, apo ta kishim kuptuar edhe unë vet, që në momentin që Spiropali i bën konkurrencë Ramës, dhe bën 20 takime, bën 1 apo 2 takime më tepër se sa Rama. Konkurrenca në demokraci është e rrezikshme, sidomos kur konkurron brenda qeverisë. Nuk është hakmarrje, por Spiropali tentoi të kalonte më lart se Rama dhe se disa ministra dhe e mori përgjigjen”, tha Rada në emisionin “Off the Record” në A2CNN.